Мөхтәрәм остазлар, мөгаллимнәр, абыстайлар, остабикәләр, педагог-укытучылар!
Бүген илебездә Укытучылар көне билгеләп үтелә. Әлеге уңайдан ихлас теләкләребезне кабул итеп алыгыз. Шәех Әйман Рөшди Сүвәйд болай дигән:
من نحن لولا مشايِخُنا ؟
من نحن لولا أساتذتُنا ؟
فإن اللّٰه يُوفِّقُنا
بدعواتِهم وبرضاهم عنَّا
“Шәехларыбыздан башка без кем? Мөгаллимнәребездән башка без кем? Хакыйкатьтә, Аллаһы Тәгалә укытучыларыбызның ихлас догалары сәбәпле һәм бездән разый булсалар гына, безгә бәрәкәт-уңышлар һәм Үзенең ярдәмен бирә”.
Бәхәссез, дөньяда һәрнәрсәнең үсешендә укытучылар төп роль уйный: динебезнең, җәмгыятебезнең һәм дәүләтебезнең чәчәк атуы алардан тора, чөнки мөгаллимнәр киләчәкне төзүче кешеләргә гыйлем бирә һәм яңа буыннарны тәрбияли. Ә иң мөһиме – остазлар безгә Ахирәттә котылу юлларын күрсәтә. Коръәндә гыйлем ияләренең – мөгаллимнәрнең дәрәҗәсе турында болай әйтелә:
يَرْفَعِ اللَّهُ الَّذِينَ آمَنُوا مِنكُمْ وَالَّذِينَ أُوتُوا الْعِلْمَ دَرَجَاتٍ
“Аллаһ арагыздан иман китергәннәрне һәм гыйлем бирелгән кешеләрне дәрәҗә ягыннан күтәрер” (“Әл-Мүҗәәдәлә” (Сүз көрәштерү) сүрәсе, 11нче аять).
Мөхтәрәм укытучылар! Раббыбыз сезне гыйлем ияләре буларак бөекләде. Әлеге вазифада игелеклелек һәм өлфәт-мәхәббәт белән хезмәт итегез. Аллаһы Тәгалә әлеге мәшәкатьле һәм изге юлда сезгә әҗер-савапларын бирсен! Хезмәтегез өчен зур рәхмәт сезгә, кадерле укытучылар! Раббыбыз сезне мәгърифәт юлында Үзенең ярдәменнән калдырмасын һәм динебез өчен ихлас гамәлләрегезне әҗер-саваплар белән бүләкләсен!
Татарстан Мөфтие Камил хәзрәт Сәмигуллин
