Бүген, рабигыль-ахыр аеның 30 нчы көнендә (22 октябрьдә), Татарстан Мөфтие Камил хәзрәт Сәмигуллин Әлмәттәге 8 нче колониядә булды. Ул колония башлыгы – эчке хезмәт полковнигы Сергей Конюхов белән очрашты. Шулай ук очрашуда Мөфтинең социаль мәсьәләләр буенча киңәшчесе, Нәзарәтнең Россия Җәзаларны үтәү федераль хезмәтенең Татарстандагы идарәсе белән хезмәттәшлек координаторы, Россия Җәзаларны үтәү федераль хезмәте Иҗтимагый советы әгъзасы, Казан шәһәренең Киров һәм Мәскәү районнары имам-мөхтәсибе Илдар хәзрәт Баязитов, Россия Җәзаларны үтәү федераль хезмәтенең Татарстандагы идарәсе каршындагы Иҗтимагый совет әгъзасы, “Ярдәм – Помощь” гомуммилләт хәйрия фонды президенты Илһам Исмәгыйлев, Россия Җәзаларны үтәү федераль хезмәтенең Татарстандагы идарәсе җитәкчесенең дин тотучылар белән эшне оештыру буенча җитәкче ярдәмчесе Альберт Шәмсунов, Татарстан Диния нәзарәтеннән куратор – Лениногорск районы мөхтәсибе Булат хәзрәт Рәүпов һәм башкалар бар иде.
Татарстан Мөфтие, 8 нче колониядә булганда, “Йосыф” мәчетендә иректән мәхрүм ителгәннәр белән аралашты. Әлеге мәчет биредә 2005 елның ноябреннән бирле эшли. Очрашу сорау-җавап форматында узды. Камил хәзрәт җәзага тартылган мөселманнарга үгет-нәсыйхәтләрен ирештерде һәм дини мәсьәләләргә кагылышлы сорауларга җавап бирде.
Бу мәчеткә 15-30 кеше йөри, җомгалар укыла, даими рәвештә ислам нигезләре буенча дәресләр, рухи әңгәмәләр үткәрелә. Рамазанда 30 кеше, ураза тотып, тәравих намазлары укый. Ураза гаете һәм Корбан гаетләренә 60 лап кеше җыела. Җәзага тартылганнар арасында ел саен Коръән укучылар һәм азан әйтү бәйгеләре уздырыла.
Татарстан мөселманнары Диния нәзарәте Россия Җәзаларны үтәү федераль хезмәтенең Татарстандагы идарәсе белән берлектә республикабыз төзәтү колонияләрендә тотылучы мөселманнар белән зур эш алып бара. Әлеге юнәлеш экстремизм күренешләрен кисәтү максатыннан тормышка ашырыла. Нәтиҗәдә Татарстан Республикасының барлык төзәтү учреждениеләрендә гыйбадәт бүлмәләре яки мәчетләр эшли, аларда махсус әзерлекле имамнар хезмәт куя. Дин әһелләре тоткыннарны дини яктан тәрбия кылу белән шөгыльләнә: вәгазьләр укый, дини сорауларга җавап бирә, Коръән укырга өйрәнергә ярдәм итә. Һәр атна саен Татарстанның барлык төрмәләрендә дә дин әһелләре белән очрашулар уза. Төзәтү колонияләре китапханәләре Нәзарәтнең “Хозур” нәшрияты чыгарган дини әдәбият белән тулыланып тора. Мөфтият Корбан бәйрәме уңаеннан азык-төлек белән тәэмин итә, Рамазан аенда гуманитар ярдәм китерү эше дә җайга салынган.
Фотосурәтләр: Россия Җәзаларны үтәү федераль хезмәтенең Татарстандагы идарәсе матбугат хезмәте.
