Бүген, җөмәдәл-ахыр аеның 9 нчы көнендә (29 ноябрьдә), “Ислам. Беренче адымнар” проектының 16 нчы сезоны төгәлләнде: кыска вакытлы курсларда укучылар намаз уку тәртипләрен һәм ислам нигезләрен өйрәнде. Казанның “Тантана” банкетлар залында курсларның ябылу тантанасы узды: анда шәкертләргә сертификатлар тапшырдылар. Курсларны 20 яшьтән алып 85 яшькә кадәрге 150 кеше тәмамлады.
“Ислам. Беренче адымнар”ның 16 нчы сезонының ябылу тантанасы Коръән уку һәм дога кылу белән башланды. Аннан соң шәкертләр имтиханда катнашты: 2 ай эчендә алган белемнәрен күрсәтте. Аннан аларга курсларны тәмамлау турында сертификатлар тапшырылды. Шәкертләр арасында бөтен гаиләләре белән белем алучылар да бар иде. Алар Татарстан Республикасы мөселманнары Диния нәзарәтенең популяр проектын оештыручыларга һәм мөгаллимнәргә ихлас рәхмәт сүзләрен җиткерде.
Дәресләрне мөфтиятнең волонтер яшьләр хәрәкәте вәкилләре алып барды. Аерым алганда, шәкертләр госел һәм тәһарәт алырга, намаз укырга өйрәнде; гакыйдәнең асылына төшенде, сира – Мөхәммәд пәйгамбәрнең ﷺ тормышы белән танышты, ураза тәртипләре буенча дәресләр тыңлады. Ислам динендә беренче адымнарын ясаучылар – ир-атлар һәм хатын-кызлар өчен дәресләр аерым узды. Укулар татар һәм рус телләрендә алып барылды.
“Ислам. Беренче адымнар” проекты – ислам дине кушканча яшәргә теләүче, әмма 3 ел дәвамында мәчет каршындагы курсларга йөрергә мөмкинлеге булмаган кешеләр өчен махсус оештырыла. Ул Татарстан мөфтияте тарафыннан 2018 елда тормышка ашырыла башлады. Уналты сезон дәвамында әлеге курсларда 1750 гә якын кеше белем алды һәм намазга басты.
