Кичә Бөгелмәдә “Милли моң” дип исемләнгән 10нчы юбилей Россиякүләм мөнәҗәтләр фестивале узды. Әлеге чара Бөек Ватан сугышында Җиңүнең 80 еллыгына, Россиядә һәм Татарстанда билгеләп үтелүче Ватанны саклаучылар елына һәм Татарстан мөфтияте тарафыннан игълан ителгән Каһарманнар елына, шулай ук һиҗри исәп буенча Пәйгамбәребез Мөхәммәд ﷺнең 1500 еллыгына багышлап уздырылды.
Бәйгене Татарстан Республикасы мөселманнары Диния нәзарәте, Бөгелмә мөхтәсибәте һәм Бөгелмә шәһәренең Татар мәдәнияте үзәге оештырды.
Әлеге чара күркәм гадәт буенча Коръән аятьләре уку белән башланып китте.
Фестивальгә шәрәфле кунаклар буларак Татарстан Мөфтиенең беренче урынбасары Илфар хәзрәт Хәсәнов, Татарстанның баш казые Җәлил хәзрәт Фазлыев, Бөгелмә муниципаль районы башлыгының беренче урынбасары Фәнис Вәгыйзь улы Мөхәммәтов, Татарстанның көньяк-көнчыгыш төбәге казые, Ютазы районы имам-мөхтәсибе Марат хәзрәт Мәрданшин, Бөгелмә шәһәре һәм Бөгелмә районы имам-мөхтәсибе Рамил хәзрәт Хөснетдинов килде.
Татарстан Республикасы Мөфтие исеменнән фестивальдә катнашучыларга һәм кунакларга сәламләү сүзе белән ТР Мөфтиенең беренче урынбасары Илфар хәзрәт Хәсәнов мөрәҗәгать итте. Ул әлеге чараны оештыруга керткән хезмәтләре өчен Бөгелмә Татар мәдәнияте үзәге җитәкчесе Регина Нәҗмиевага һәм волонтёр Лилия Бакановага рәхмәт хатлары тапшырды. Бөгелмә муниципаль районы башлыгы, Бөгелмә шәһәре мэры Дамир Фәттахов исеменнән барлык катнашучыларны аның урынбасары Фәнис Мөхәммәтов сәламләде.
Татар мәдәнияте үзәге залында узган фестивальгә 250гә якын талантлы мөнәҗәт башкаручы җыелды. Әлеге проектның географиясе елдан-ел киңәя бара: быел катнашучылар Чиләбе, Самара, Оренбург өлкәләреннән, Башкортстан Республикасыннан, Магнитогорск, Казан, Чаллы, Түбән Кама, Бөгелмә шәһәрләреннән, Лениногорск, Биектау, Яңа Чишмә, Чистай, Баулы, Сарман, Кукмара, Ютазы, Мөслим, Чирмешән, Теләче, Югары Ослан, Яңа Чишмә районнарыннан килде.
Бәйгедә катнашучыларның иҗади чыгышларын Татарстанның халык артисты Зөһрә Сәхабиева, Татарстанның атказанган артисты, педагогика фәннәре кандидаты, Казаннең “Мөнбәр” театры җитәкчесе Ильяс Халиков, нәшидлар һәм мөнәҗәтләр башкаручы, “Татар азаны” бәйгесе җиңүчесе, “Манзара” премиясе иясе, Россиякүләм һәм халыкара конкурслар лауреаты Динар Шәймәрданов, һөнәри, халыкара, республикакүләм һәм төбәкара конкурслар лауреаты һәм дипломанты Римма Кадыйровадан торган жюри бәяләде.
Бәйге ике номинациядә үтте: “Соло” һәм “Ансамбльләр”. “Соло” номинациясендә катнашучылар өч яшь төркеменә бүленде: кече (7-12 яшь), урта (13-17 яшь) һәм өлкән (18 яшьтән өлкәнрәк). “Ансамбльләр” номинациясе ике төркемнән торды: кече (мәктәп яшендәге балалар) һәм өлкәннәр. Жюри катнашучыларның башкару осталыгына, образлы эчтәлекне хис белән тапшыруга, төгәл дикциягә, ачык аһәңгә, интонациягә һәм тышкы кыяфәткә игътибар итте. Костюмнар һәр кешенең зәвыгына, күңел халәтенә туры килерлек булды: ул мөнәҗәт башкаручыларга үзенә бер ямь биреп торды.
Бәйге нәтиҗәләре:
“Соло” номинациясе (7-12 яшьлекләр)
1нче урын – Хәйдәров Айдан (Башкортстан, Туймазы районы, Кандра авылы);
2нче урын – Галимова Камилә (Бөгелмә ш.);
3нче урын – Шәрипова Чулпан (Кандра авылы).
“Соло” номинациясе (13-17 яшьлекләр)
1нче урын – Сабирҗанова Самирә (Сарман авылы);
2нче урын – Мөхәммәтов Назил (Сарман авылы);
3нче урын – Хәсәнова Нәбилә (Яңа Чишмә районы).
“Соло” номинациясе (18 яшьлекләр һәм аннан өлкәнрәкләр)
1нче урын – Зәйдуллина Нурсина (Самара өлкәсе);
2нче урын – Нәсыйфуллина Алсу (Чаллы);
2нче урын – Пшеничникова Гөлфия (Карабаш бистәсе);
3нче урын – Шакирова Рәмзия (Биектау районы);
3нче урын – Ваһапова Рәисә (Оренбург өлкәсе).
“Ансамбльләр” номинациясе (мәктәп яшендәгеләр)
1нче урын – “Сеңелкәш” дуэты (Бөгелмә шәһәре);
2нче урын – “Шатлык” (Сарман).
“Ансамбльләр” номинациясе (18 яшь һәм аннан өлкәнрәкләр)
1нче урын – “Сердәш” (Сарман авылы);
2нче урын – “Аккош” (Чиләбе өлкәсе);
2нче урын – “Мәрҗән” (Казан шәһәре);
3нче урын – “Кәүсәрия” (Магнитогорск шәһәре);
3нче урын – “Бөгелмә сердәшләре” (Бөгелмә шәһәре).
Тамашачы мәхәббәте (7-12 яшьлекләр)
1 – Белоногова Радмила (Җәлил бистәсе);
2 – Гыйльманова Айгөл (Бөгелмә шәһәре).
Тамашачы мәхәббәте (18 яшь һәм аннан өлкәнрәкләр)
1 – Шәйдуллин Рафис (Кукмара);
2 – Хөснетдинов Рәфкать (Бөгелмә шәһәре).
Җиңүчеләргә дипломнар һәм кыйммәтле бүләкләр тапшырылды.
Фотосурәтләр: Бөгелмә мөхтәсибәте.
