Бүген, Мөхәррам аеның 29 нчы көнендә (24 июль), Болгарда Татарстан Мөфтие Камил хәзрәт Сәмигуллин XX Бөтенроссия мөселман яшьләре форумында катнашучылар белән очрашты. Җыен Диния нәзарәте тарафыннан Ислам мәдәнияте, фәне һәм мәгарифенә ярдәм фонды белән берлектә Болгар ислам академиясе теләктәшлегендә уздырыла. Форум Россия өммәтенең көнүзәк мәсьәләләрен хәл итүгә юнәлдерелгән яшьләр идеяләре һәм социаль проектлар генераторы форматында оештырыла һәм аларны гамәлгә ашыру өчен мөмкинлекләр мәйданчыгы булып тора. Быел Форумда Россиянең 18 төбәгеннән 130 кеше катнаша.
Бүген Мөфтинең яшьләр белән очрашуы җәмәгать белән укылган өйлә намазыннан соң узды. Әңгәмә башында Камил хәзрәт форумда катнашучыларга Пәйгамбәр ﷺ сөннәте һәм мәзһәбкә иярүнең мөһимлеге, Коръән өйрәнүнең фазыйләтләре, галимнәргә хөрмәт һәм фәннәрне өйрәнү турында сөйләде, ә аннары Мөфти яшьләрнең сорауларына җавап бирде. Форумда катнашучыларны төрле өлкәләрдәге фикһ һәм әдәп мәсьәләләре кызыксындырды: алар никахтан алып дискуссияләрдә катнашуга кадәр сорауларны колачлады.
Мөфти хәзрәт Форумда катнашучыларга Диния нәзарәтенең төрле проектлары белән кызыксынуы һәм ышаныч белдерүе өчен рәхмәт белдерде, проектларны яклаганда уңыш һәм аларның мөселман өммәте файдасына уңышлы гамәлгә ашырылуын теләде.
Файдалы һәм кызыклы программа кысаларында фикерле яшьләр социаль проектлау күнекмәләрен үзләштерә һәм социаль стартапларны оештырырга өйрәнә: алар идея рәвешендә яки грант алырлык әзер проект булырга мөмкин. Аерым алганда, яшь мөселманнар мастер-класслар, шәхси үсеш буенча тренинглар, өйрәтүче чараларда катнаша.
26 июльдә грантлар бәйгесе кысаларында социаль проектларны яклау Форумның мөһим өлеше булып тора. Бу көнне иң яхшы дип табылган проектлар Диния нәзарәтеннән һәм Форум партнерларыннан финанс, мәгълүмати һәм консультацион ярдәм алачак. Кичә проектларны грантлар бәйгесенең сайлап алу турында якладылар. Анда тәкъдим ителгән 61 проектның 17 се грантлар бәйгесенә кертелде.
Шунысын билгеләп үтәргә кирәк: Форумда катнашучылар тәкъдим иткән «Син ялгыз түгел», «Әс-сәлам» заманча сәнгать күргәзмәсен оештыру проекты, «Бармак очында Коръән», «Мөселман яшүсмерләре өчен «Тәрбия» мәдәни чатыры», “Ислам тикшеренүләре яшьләр конференциясе” кебек проектлар һ.б. уңышлы тормышка ашырыла. Мәсәлән, «Син ялгыз түгел» проектының максаты Чистай балалар йортын тәмамлаучыларның тормышка әзерләүдән гыйбарәт.
Белем бирү һәм өйрәтү чараларыннан тыш, Форум программасы тарих белән таныштыруны, шулай ук танылган дин әһелләреннән лекцияләр, төрле интеллектуаль, мәдәни һәм спорт чараларын үз эченә ала.
Иртәгә форум программасы кысаларында инициативалы яшьләр белән шәех доктор, Катар университеты профессоры Яхъя Нуайми очрашачак. Очрашу Болгар ислам академиясе ярдәмендә оештырыла.
