Бүген Татарстан Республикасы мөфтие Камил хәзрәт Сәмигуллин Кол Шәриф мәчетендә Кытайның сәнәгать һәм мәгълүматлаштыру министры Мяо Вэй җитәкчелегендәге делегацияне кабул итте. Кытай министры Казанга кичә сәнәгать өлкәсендә хезмәттәшлек буенча Россия-Кытай комиссиясенең икенче утырышында катнашу өчен килгән иде.
Кунаклар утырыш башланыр алдыннан Казан Кремле, аерым алганда Кол Шәриф мәчете һәм Ислам мәдәнияте музее белән танышты. Кол Шәриф мәчетендә Кытай делегациясен Татарстан мөфтие каршы алды һәм әлеге мәчетнең тарихы, төзелү үзенчәлекләре белән таныштырды, шулай ук Татарстандагы дини вәзгыять турында сөйләде. Ислам мәдәнияте музеенда кунакларга экскурсияне музейның директоры Илнур Низамиев үткәрде, татарларда ислам дине таралуы белән бәйле истәлекле экспонатларны күрсәтте. Шулай ук татар милләтенең формалашуында ислам диненең роле турында сөйләде, беренче басма Коръәннең Казанда басылуы турында әйтте һәм борынгы Коръәннәрне, дини чыганакларны күрсәтте.
Россия-Кытай комиссиясе утырышы эшендә бүген Татарстан Президенты Рөстәм Миңнеханов катнашачак. Утырышта суднолар, автомобиль төзелеше, авиатөзелеш һәм авиация өлкәләрендә Россия-Кытай хезмәттәшлеге каралачак.
