Бүген, Рабигыль-әүвәл аеның 18нче көнендә (10нчы сентябрьдә), Татарстан мөфтиятендә шәех Абдалла бин Зәйд Әл-Мәхмүд исемендәге Ислам мәдәнияте үзәге директоры Салех бин Али әл-Ахн әл-Марри җитәкчелегендәге Катар делегациясе булып китте. Чит ил кунаклары арасында шулай ук Катар университеты шәригать факультеты ислам тикшеренүләре кафедрасы доценты Яхъя Хамад әл-Нуайми, Катарның Вакыфлар һәм ислам эшләре министрлыгы каршындагы шәригать белгече Мөхәммәд Мәхмүд әл Мәхмүд, Катарның Вакыфлар һәм ислам эшләре министрлыгы каршындагы Дәгъвәт һәм ислам эшләре институты рәисе Науаф Фәхд әл-Отейби, шәех Абдулла бин Зәйд исемендәге Ислам мәдәнияте үзәгенең ислам мәдәнияте бүлеге җитәкчесе Әхмәд Абдулрәхим әт-Таххан бар иде. Катар делегациясен Татарстан Мөфтие Камил хәзрәт Сәмигуллин каршы алды.
Ул Татарстан Диния Нәзарәтенең Коръәнне өйрәнү, нәшрият эшчәнлеге, мәгърифәтчелек һәм белем бирү өлкәсендәге соңгы казанышлары һәм проектлары турында сөйләп узды. Әңгәмә барышында ислам мәдәниятен һәм мәгарифен үстерү буенча хезмәттәшлек мөмкинлекләре хакында да фикер алыштылар.
Нәзарәттә булу барышында Катар делегациясе “Мөхәммәдия” мәдрәсәсенә дә кереп чыкты. Кунаклар уку йортының яңартылган тарихи бинасын карады, уку-укыту гамәлгә ашырыла торган шартлар белән танышты – уку сыйныфларын, кабинетларны, китапханәне, музейны карадылар. Моннан тыш, мәдрәсәдә делегация шәкертләр белән очрашты.
