Бүген, рабигыль-әүвәл аеның 6 нчы көнендә (29 августта), Татарстан мөселманнары Диния нәзарәтендә «Ислам хезмәттәшлеге оешмасының яшьләр форумы» халыкара оешмасы президенты Таха Айхан булып китте. Хөрмәтле кунакны Татарстан Республикасы Мөфтие Камил хәзрәт Сәмигуллин каршы алды. Кунак Казанга Глобаль яшьләр саммитында катнашу өчен килде.
Мөфтияттә узган очрашуда Камил хәзрәт кунакны Нәзарәтнең төп эш юнәлешләре, аерым алганда, Коръәнне өйрәнү, заманча халыкара стандартларга туры китереп мүсхәфләр бастыру һәм курра-хафизлар әзерләү, татар халкының бай дини мирасын мәңгеләштерү барышы, шулай ук шулай ук хәйриячелек, вакф үсеше, ислам финанслары һәм хәләл индустриясе, яшьләр белән эшләү юнәлешләре белән таныштырды.
