Бүген, 28нче август көнне, Казанда “Татарстан – рухи Ватаным” исеме астында “Милләт җыены” пленар утырышы узды. Утырышны Татарстан Республикасы Премьер-министры урынбасары, Бөтендөнья татар конгрессының Милли Шура рәисе Васил Шәйхразыев алып барды.
Җыелышның шәрәфле кунаклары арасында Татарстан Республикасы Рәисе Рөстәм Миңнеханов, Татарстан Республикасы Дәүләт Киңәшчесе, Россия Федерациясе Хезмәт Герое Минтимер Шәймиев, шулай ук танылган дин әһелләре – Татарстан Мөфтие Камил хәзрәт Сәмигуллин, Россия мөселманнарының Үзәк Диния нәзарәте рәисе Тәлгать хәзрәт Таҗетдин, Россия мөселманнары Дини җыены башлыгы Әлбир хәзрәт Крганов һ.б. бар иде.
“Милләт җыены”на дөньяның 27 дәүләтеннән һәм Россиянең 68 төбәгеннән 965 делегат килде. Җыелыш Бөтендөнья татар конгрессының ике корылтае арасында агымдагы көнүзәк мәсьәләләрне хәл итү һәм хәзерге заман шартларында татар милләте үсешенең хәлиткеч юнәлешләрен билгеләү максатыннан үткәрелә.
