Бүген, шәүвәл аеның 13 нче көнендә (25 нче май), Кол Шәриф мәчетендә Татарстан Республикасы мөселманнары Диния нәзарәте һәм "РФ Мөселман эшкуарлары ассоциациясе"нең Хәйрия фонды арасында хезмәттәшлек турында килешү имзаланды. Документка Татарстан Республикасы мөфтие Камил хәзрәт Сәмигуллин һәм РФ Мөселман эшкуарлары ассоциациясе президенты Айдар Шаһимәрданов кул куйды. Тарихи документ аерым юнәлешләрдә уртак һәм килешенгән рәвештә хезмәттәшлек итүне күз алдында тота. Алар - Ислам фәнен һәм мәгарифен үстерү, мәчетләр һәм мәдрәсәләр төзү һәм аларны төзекләндерү, ислам дисциплиналары мөгаллимнәренә һәм хәзрәтләргә ярдәм итү, шулай ук "Авылларга ярдәм" проектын тормышка ашыру.
