Бүген Россия ислам институтында Ислам мәгарифе советының эшче төркем утырышы уза. Киңәшмә эшендә советның рәисе, РИИ ректоры Рәфикъ Мөхәммәтшин, фәлсәфә фәннәр докторы, Ислам мәдәнияте, фәне һәм мәгарифенә ярдәм фонды директоры урынбасары Али-Вячеслав Полосин, Россия ислам институтының укыту эшләре буенча проректоры Марат Гыйльманов, Болгар ислам академиясе проректоры Алексей Петров, Дагыстан ислам университеты ректоры Йосыф Абдусалимов, Мөселманнарның Үзәк Диния нәзарәтенең Россия ислам университеты ректоры Артур Сөләйманов һәм башкалар катнаша. Очрашу барышында Россиядә ислам мәгарифе системасын үстерү мәсьәләләре турында фикер алышалар. Аерым алганда, сүз мөселман белем бирү стандартларын иҗтимагый аккредитацияләү, студентларга патриотик тәрбия бирү, студентларны мөселман уку йортларына укырга максатчан җыю мөмкинлеге һәм башка мөһим мәсьәләләр турында барды.
