Казанда бер түгәрәк өстәлгә гарәп дөньясының һәм Россиянең иң зур массакүләм мәгълүмат чаралары җыелды. Моның сәбәбе булып «Эфирда дин: конфессиональ массакүләм мәгълүмат чаралары хәзерге медиакиңлек сегменты буларак» Халыкара фәнни-гамәли конференциясе торды. Әлеге чараны Татарстан Республикасы мөселманнары Диния нәзарәте «Россия – Ислам дөньясы: Kazansummit –2018» Х Халыкара икътисади саммит кысаларында оештырды. Конференция кунаклары буларак Төркия, Мисыр, Берләшкән Гарәп Әмирлекләре, Сүрия, Гыйрак, шулай ук Россиянең федераль һәм региональ массакүләм мәгълүмат чаралары: Дагстан, Чечня, Кырым, Якутия һәм башка төбәк журналистлары катнашты. ТК «Аль-Маядин», «Аль-Ишрак», «Аль-Ахрам», «Дубай ТВ», ТРТ «Диянет», ТК «RT», МИА «Россия сегодня», «Российская газета», «Кавказский узел» һәм башка телекомпания, газета, порталларның җитәкчеләре һәм танылган авторлары дини массакүләм мәгълүмат чараларының мәсьәләләрен карадылар, тәҗрибәләре белән уртаклаштылар. Түгәрәк өстәлдә сүз экстремизмга каршы мәгълүмати яктан каршылык күрсәтү өчен технологик мәйданчык булдыру турында барды.
